Federata Shqiptare e Futbollit ka zyrtarizuar ndryshimin e formatit për Kategorinë Superiore, duke hequr skemën e Final Four që ishte aplikuar në dy sezonet e fundit. Sipas modelit të ri, nuk do të ketë më gjysmëfinale dhe finale, ndërsa kampionati do të zgjatet me tre javë të tjera mini-kampionat. Pas 36 javëve të rregullta, katër skuadrat e para do të vazhdojnë garën me pikë të përgjysmuara.
Shumica e klubeve të Superiores janë shprehur dakord me këtë formulë, përveç Vllaznisë. Kuqeblutë propozuan një tjetër skemë, sipas së cilës pikët në fund të fazës së rregullt do të zeroheshin, dhe më pas do të luheshin gjysmëfinalet me sistem vajtje-ardhje (i pari me të katërtin dhe i dyti me të tretin), ndërsa finalja do të zhvillohej në stadiumin “Air Albania”. Megjithatë, ky propozim nuk është miratuar nga Komiteti Ekzekutiv i FSHF-së.
