Në nderim të ditës së lindjes së poetit dhe lirikut të njohur Skënder Rusi, Bashkia Devoll organizoi një mbrëmje letrare të veçantë, duke kujtuar jetën dhe veprën e një prej zërave më të ndjerë të poezisë shqiptare. Aktiviteti u mbajt në një atmosferë të ngrohtë dhe reflektuese, ku fjala artistike ishte protagoniste e mbrëmjes.
Në qendër të këtij eventi kulturor ishte promovimi i vëllimit të fundit poetik të autorit, “Ditët e mia pa ty”, një botim që sjell për lexuesin një përmbledhje të thellë emocionale dhe reflektive, e cila dëshmon për fuqinë dhe ndjeshmërinë e penës së Rusit.
Të pranishëm në këtë veprimtari ishin familjarë të poetit, miq të afërt, studiues, përfaqësues të institucioneve lokale dhe dashamirës të poezisë, të cilët ndanë interpretime, kujtime personale dhe vlerësime për kontributin e Skënder Rusit në letërsinë shqipe.
Fjalët e ngrohta dhe recitimet prekëse rikthyen në kujtesën kolektive një figurë letrare që, megjithëse nuk është më fizikisht mes nesh, vijon të jetojë në zemrat e lexuesve përmes vargjeve të tij të pavdekshme.
Ky aktivitet dinjitoz shërbeu si një homazh për Skënder Rusin, një poet që nuk shuhet, por jeton përmes fjalës së shkruar.
