Klubi i Skënderbeut ka zyrtarizuar një tjetër përforcim cilësor në prag të pjesëmarrjes historike në UEFA Youth League. Bëhet fjalë për Gazment Lamallarin, një nga talentet më premtues të akademisë së FC Shkupit, i cili ka zgjedhur t’i bashkohet bardhekuqve.
18-vjeçari pritet të jetë një shtesë e vlefshme për ekipin U-19 të Skënderbeut, që do të përfaqësojë Shqipërinë në arenën europiane për të rinj. Lamallari ka spikatur me qëndrueshmëri, inteligjencë taktike dhe grintë, elemente që bindën drejtuesit korçarë ta afronin për sezonin e ri.
Dyfish objektiv për Lamallarin
Edhe pse fillimisht do të jetë pjesë e grupit U-19, Lamallari do të jetë edhe në vëzhgimin e stafit të ekipit të parë, si një prurje me potencial afatgjatë për formacionin e Superiores.
Me ekipin e të rinjve të FC Shkupit, Lamallari mbylli një sezon të shkëlqyer: kampion kombëtar dhe fitues i Kupës, duke dhënë një kontribut të drejtpërdrejtë në suksesin e dyfishtë të skuadrës.
Skënderbeu vijon të ndërtojë jo vetëm për sot, por edhe për të ardhmen, me emra si Gazment Lamallari që premtojnë shumë.
