Në fshatin piktoresk të Polenës, pranë qytetit të Korçës, u zhvillua edhe këtë vit Festa e Lakrorit – një ngjarje tradicionale që bashkon shijen karakteristike të zonës me trashëgiminë kulturore.
Festa mblodhi banorët e zonës, vizitorë dhe turistë të shumtë nga qytete të ndryshme të vendit, si dhe emigrantë që ishin kthyer për pushime. Në qendër të veprimtarisë ishte lakrori i pjekur në saç, një recetë tipike korçare që përgatitet me kujdes dhe dashuri nga gratë e fshatit, duke ruajtur traditat shekullore të kuzhinës vendase.
Atmosfera festive u shoqërua me muzikë e valle tradicionale, panair me produkte artizanale dhe bujqësore të zonës, si dhe aktivitete të tjera kulturore që e bënë këtë ditë një festë të identitetit lokal.
Festa e Lakrorit në Polenë është tashmë një simbol i gjallë i trashëgimisë kulturore të Korçës dhe një mundësi për të promovuar turizmin rural dhe gastronominë autentike shqiptare.
