Në ambientet e Bashkisë Pogradec u zhvillua sot një konsultim publik i hapur me qëllim përgatitjen e Planit të Arsimit Parauniversitar për vitet në vijim. Takimi mblodhi përfaqësues të institucioneve arsimore, drejtues shkollash, mësues, nxënës, prindër si dhe anëtarë të komunitetit lokal, të cilët ndanë mendimet dhe propozimet e tyre për përmirësimin e sistemit arsimor në qytet.
Kryetarja e Këshillit Bashkiak të Pogradecit, e cila drejtoi diskutimet, theksoi rëndësinë që ka ky proces i konsultimit publik për ndërtimin e një plani të qëndrueshëm, gjithëpërfshirës dhe të zbatueshëm për arsimin parauniversitar. Ajo u shpreh se përfshirja e të gjithë aktorëve është çelësi për hartimin e politikave arsimore që reflektojnë realisht nevojat e komunitetit dhe potencialin e brezave të rinj.
“Qëllimi ynë është i qartë: të krijojmë kushte më të mira për mësimdhënie dhe mësimnxënie, të rrisim cilësinë e arsimit dhe të sigurojmë një të ardhme më të mirë për fëmijët tanë,” u shpreh Kryetarja e Këshillit gjatë fjalës së saj.
Në përfundim të takimit, u vlerësua larmia e ideve dhe sugjerimeve të dhëna, ndërsa u ritheksua se Plani i ri i Arsimit Parauniversitar do të ndërtohet mbi bazën e dialogut të hapur me qytetarët dhe ekspertët.
Ky proces shënon një hap të rëndësishëm drejt një qasjeje më transparente dhe pjesëmarrëse në vendimmarrjen publike për çështje të arsimit në Bashkinë Pogradec.
