Kultura e misrit mbetet një ndër më të rëndësishmet për fushën bujqësore të Maliqit, duke shërbyer si burim kryesor për koncentrat në blegtori dhe në komplekset e pularive.
Specialisti i bujqësisë, Arben Dulellari, thekson se këtë verë, me temperatura të larta dhe mungesë të ndjeshme reshjesh, misri ka pasur zhvillim më të mirë në tokat torfike. Këto toka, që zënë rreth 5000 hektarë, kanë ruajtur më shumë freski dhe lagështi, duke favorizuar rritjen e bimës në krahasim me toka të tjera.
Sipas Dulellarit, për shkak të kushteve të favorshme dhe performancës më të lartë të prodhimit, tokat torfike duhet të jenë prioritet në zgjerimin e sipërfaqeve të mbjella me misër. Në treg gjenden sot hibride të reja cilësore, me cikël të shkurtër dhe të mesëm, të cilët sigurojnë rendimente të kënaqshme dhe justifikojnë përpjekjet e fermerëve.
