Korça çel sot edicionin e 18-të të Festës së Birrës, një nga ngjarjet më të mëdha turistike dhe kulturore në vend, e cila vit pas viti tërheq vizitorë nga çdo cep i Shqipërisë dhe rajoni. Nënkryetarja e Bashkisë Korçë, Benila Themeli, në një intervistë për portalin tonë u shpreh se kjo edicion vjen më i madh dhe më i pasur se kurrë, me një program të larmishëm aktivitetesh dhe performancash muzikore, duke premtuar pesë netë të mbushura me energji dhe argëtim.
“Hotelet e qytetit janë të gjitha të rezervuara, dhe atmosfera në Korçë premton një sukses të madh. Në skenë do të ngjiten artistë të njohur shqiptarë dhe të huaj, ndërsa pjesëmarrja e bizneseve është rritur ndjeshëm krahasuar me vitet e kaluara,” u shpreh Themeli, duke shtuar se hyrja në të gjitha netët e festivalit do të jetë falas për publikun.
Organizatorët kanë siguruar gjithashtu zona të veçanta për rezervimin e tavolinave me pagesë, ku të ardhurat shkojnë për ushqim dhe pije për vizitorët, duke garantuar një përvojë të këndshme dhe të organizuar për të gjithë pjesëmarrësit. Festivali, i mbështetur nga Bashkia Korçë dhe partnerët e saj, do të ofrojë pesë ditë të mbushura me muzikë live, aktivitete argëtuese dhe degustime të birrës korçare, duke kthyer qytetin në një qendër të gjallë festive dhe kulturore.
Ky edicion, si çdo vit, synon jo vetëm të ruajë traditën e Festës së Birrës, por edhe të ofrojë një eksperiencë të paharrueshme për vizitorët dhe banorët e Korçës, duke forcuar imazhin e qytetit si destinacion turistik dhe kulturor.
