Korça mbylli me sukses edicionin e 19-të të Festës së Birrës, e cila u zhvillua nga 13 deri më 17 gusht dhe solli në qytetin juglindor mijëra vizitorë. Atmosfera kulmoi në natën e fundit, ku artistë të njohur si Anxhela Peristeri, Fifi, Aurel Thëllimi dhe të tjerë ndezën skenën me performancat e tyre.
Sipas organizatorëve, gjatë pesë netëve morën pjesë mbi 10 mijë qytetarë e turistë, të cilët shijuan muzikën, argëtimin dhe atmosferën unike që kjo festë sjell çdo vit.
“Korça tregoi edhe një herë se di të presë, të argëtojë dhe të dhurojë emocione të paharrueshme”, u shpreh kryebashkiaku Sotiraq Filo.
Festa e Birrës, e cila prej 19 vitesh është kthyer në simbol të verës shqiptare, mbetet një nga eventet më të rëndësishme festive e turistike në vend, duke promovuar traditën dhe mikpritjen korçare.
