ADZM Korçë, në bashkëpunim me Bashkinë Kolonjë, ka shenjuar së fundmi shtegun e ri malor “Ersekë – Starje – Llazishtë”, i cili ndjek aksin e vjetër të rrugës Ersekë – Korçë.
Ky itinerar u ofron vizitorëve një përvojë unike ecjeje në mes të natyrës së paprekur të Kolonjës, e cila shpesh përshkruhet si një “kurorë bekimi”. Shtegu është i përshtatshëm për dashamirësit e turizmit malor, të ecjes në natyrë, por edhe për ata që kërkojnë të zbulojnë trashëgiminë historike dhe kulturore të zonës.
Kolonja prej kohësh është një destinacion në rritje për turizmin e qëndrueshëm, falë peizazheve mahnitëse, mikpritjes dhe mundësive të shumta për aktivitete në natyrë. Me shenjimin e këtij shtegu të ri, vizitorët do të kenë mundësi të eksplorojnë një tjetër dimension të bukurive të saj, duke e bërë rajonin edhe më tërheqës për turizmin vendas dhe të huaj.
