Nga data 24 deri më 26 tetor, Korça do të shndërrohet në kryeqendrën e muzikës frymore, ku rrugët dhe sheshet e qytetit do të mbushen me tingujt e bandave muzikore nga Shqipëria, Ballkani dhe Europa.
Për tre ditë me radhë, qytetarët dhe vizitorët do të kenë mundësinë të ndjekin një spektakël unik, që sjell jo vetëm art dhe argëtim, por edhe një rikthim tek historia dhe tradita e qytetit. I frymëzuar nga dy bandat e njohura “Vatra” dhe “Iliria”, festivali “LULU FEST” vjen si një ndërthurje mes të shkuarës dhe së tashmes, duke nderuar Ditën e Çlirimit dhe duke e përcjellë krenarinë kombëtare në një formë festive.
Organizatorët theksojnë se ky aktivitet synon të kthehet në një traditë të përvitshme, duke promovuar kulturën muzikore dhe duke forcuar identitetin kulturor të Korçës si një qytet i artit dhe i historisë.
