Universiteti “Fan S. Noli” në Korçë kremtoi më 6 tetor ceremoninë e diplomimit “Dita Akademike 2025”, ku u diplomuan 773 studentë të vitit akademik 2024-2025.
Këtë vit, 60 studentë përfunduan studimet në Fakultetin e Bujqësisë, 217 në Fakultetin e Ekonomisë, 184 në Fakultetin e Edukimit dhe Filologjisë dhe 312 në Fakultetin e Shkencave Natyrore dhe Humane. Për rezultatet e tyre të larta u vlerësuan me “Medalje të Artë” dy studente, 10 të tjerë si “Studentë të Shkëlqyer”, ndërsa mbi 160 studentë u përfshinë në Librin e Nderit të Universitetit.
Në fjalën përshëndetëse, rektori prof. dr. Lorenc Ekonomi uroi studentët duke theksuar se diploma është dëshmi e pjekurisë akademike dhe profesionale, një bazë e fortë për suksesin e tyre në të ardhmen. “Kjo ditë shënon jo vetëm një përmbyllje, por edhe një fillim të ri”, tha ai, duke nënvizuar rolin e rëndësishëm që kanë fushat e studimit në zhvillimin e shoqërisë.
Ceremonia u përcoll edhe me urime nga përfaqësues të pushtetit lokal, mes tyre kryetari i Këshillit të Qarkut Korçë, Petrika Tollkuçi, dhe deputetja Ledina Alolli. Aktiviteti u mbyll me Betimin e Hipokratit nga studentët e diplomuar të Infermierisë.
