Kryetari i Bashkisë Korçë, Sotiraq Filo, së bashku me Ministren e Arsimit dhe Sportit, znj. Mirela Kumbaro, dhe Ambasadoren e Francës në Shqipëri, znj. Catherine Suard, zhvilluan një vizitë në Polin e Dijes, një nga investimet më të rëndësishme në fushën e arsimit dhe inovacionit në qytetin e Korçës.
Ky projekt i ri arsimor synon të krijojë një hapësirë bashkëkohore për studentët dhe të rinjtë, me auditorë, laboratorë, bibliotekë dhe ambiente moderne mësimore, që do të mundësojnë ndërthurjen e teorisë me praktikën dhe zhvillimin e kreativitetit.
Në fjalën e tij, kryebashkiaku Sotiraq Filo theksoi se Poli i Dijes është një simbol i investimit në të ardhmen e qytetit dhe një hap drejt forcimit të lidhjes mes arsimit, inovacionit dhe komunitetit.
“Jam i bindur se Poli i Dijes do të sjellë energji, ide të reja dhe mundësi për të gjithë banorët, duke e bërë Korçën një vend ku dija dhe inovacioni janë gjithmonë në fokus,” – u shpreh Filo.
Ky projekt pritet të kthehet në një qendër referimi për zhvillimin arsimor dhe teknologjik të rajonit juglindor, duke forcuar pozicionin e Korçës si qytet i dijes dhe kulturës.
