Pazari i Vjetër është renditur mes projekteve më të mira në botë që po ridimensionojnë jetën urbane në shekullin XXI, duke u vlerësuar nga The Bay Awards Bilbao, një nga platformat më prestigjioze ndërkombëtare për zhvillim urban dhe arkitekturë me ndikim shoqëror.
Ky çmim vjen si një njohje e qartë e suksesit të modelit BID (Business Improvement District) dhe përpjekjeve të TID Korça, që prej vitesh kanë transformuar Pazarin e Vjetër në një qendër të gjallë kulturore, turistike dhe ekonomike.
Falë mbështetjes së Fondacionit Shqiptaro-Amerikan për Zhvillim (AADF) dhe Bashkisë Korçë, ky projekt ka arritur të ruajë identitetin historik të zonës, duke i dhënë jetë një hapësire ku trashëgimia kulturore ndërthuret me sipërmarrjen moderne dhe turizmin cilësor.
Në njoftimin zyrtar të jurisë ndërkombëtare thuhet se Korça përfaqëson një model të qëndrueshëm urban, ku komuniteti, biznesi dhe institucionet punojnë së bashku për të ndërtuar një qytet me vizion, pa humbur shpirtin e traditës.
Ky sukses konfirmon edhe një herë se Korça po ecën me hapa të sigurt drejt së ardhmes, duke u bërë shembull për mënyrën se si zhvillimi urban mund të ndërtohet mbi vlerat e trashëgimisë kulturore.
Pazari i Vjetër i Korçës – një histori e ringjalljes urbane që tashmë frymëzon botën.
Lexo më shumë në faqen zyrtare të The Bay Awards
