Reshjet e vazhdueshme të natës kanë shkaktuar sërish probleme në disa zona të qarkut Korçë, megjithatë situata në mëngjes paraqitet në stabilizim gradual. Strukturat vendore dhe ekipet e emergjencës kanë qenë të angazhuara gjatë natës, duke bërë të mundur tërheqjen e ujit në pjesën më të madhe të territorit dhe garantimin e qarkullimit në aksin kryesor rrugor.
Në Bashkinë Korçë, njësitë administrative Bulgarec, Vithkuq, Drenovë dhe Mollaj janë drejt normalizimit, pasi ujërat janë tërhequr. Në Kolonjë vijojnë të jenë të bllokuara urat në Qafëzez dhe Qinam, por me rënie të dukshme të nivelit të ujit, ndërsa rezervuarët Helmes dhe Kabash–Leskovik paraqiten të stabilizuar. Sot parashikohet ndërhyrje në parcelat e përmbytura në Taç Poshtë, Novoselë dhe Qinam.
Në Maliq, ndërhyhet intensivisht për riparimin e çarjeve të argjinaturave të lumenjve Devoll dhe Dunavec, ndërsa përfshirja e forcave të Repartit Ushtarak 1033 ndihmon në menaxhimin e situatës. Fshatrat Moçan, Desmire, Osojë dhe Gjinikas mbeten të izoluar pas shembjes së urave, ndërsa rrëshqitjet e dherave në Senisht dhe Dolan vijojnë të rrezikojnë banesa.
Devolli shënon përmirësim të dukshëm, pasi uji në Proger dhe Macurisht është tërhequr dhe personi i humbur është gjetur. Në Pustec situata është e qetë, me punë në terren vetëm për largimin e ujit nga bodrumet. Ndërkohë, në Pogradec janë raportuar dëmtime në rreth 50 banesa dhe në pesë ura, por ndërhyrjet po vijojnë pa ndërprerje. Hidrovori Tushemisht mbetet funksional dhe përdoret si element kyç në menaxhimin e prurjeve.
OSHEE raportoi disa defekte në rrjetin elektrik në zona rurale të Korçës, Maliqit, Devollit dhe Kolonjës, duke lënë pa energji rreth 670 abonentë. Ekipet e terrenit po punojnë për rikthimin e furnizimit, ndërsa linjat që mbështesin konsumatorë strategjikë janë aktive.
Sipas ARRSH, qarkullimi në akset kryesore të qarkut është normal, me përjashtim të urës lidhëse Qinam–Selenicë që vijon të jetë e bllokuar. Pastrimi i inerteve përgjatë Korçë/Boboshticë–Dardhë dhe zonave të Podgories ka bërë të mundur që trafiku të jetë i garantuar.
Strukturat e emergjencave dhe njësitë vendore vijojnë monitorimin në vijimësi, ndërsa punimet në terren pritet të intensifikohen gjatë ditës për të mundësuar rikthimin e plotë të normalitetit në territor.
