Banorët e njësisë administrative Çlirim kanë protestuar në hyrje të urës së fshatit Qafëzez, e cila është shembur plotësisht pas reshjeve të fundit, duke izoluar 12 fshatra dhe duke ndërprerë lidhjen me aksin kombëtar Ersekë–Korçë.
Ura, e konsideruar nyja kryesore lidhëse e zonës, ka qenë prej vitesh në gjendje të degraduar sipas banorëve, por mungesa e ndërhyrjeve dhe shirat e ditëve të fundit kanë çuar në kolapsin e saj total. Aktualisht ajo është e pakalueshme si për automjetet, ashtu edhe për këmbësorët.
“Para një jave ra një shi i papare, uji erdhi me vrull dhe ura u bastardua. Ka 4 vite që nuk është vënë dorë”, shprehet një prej banorëve. Të tjerë theksojnë se prej ditësh janë të izoluar, mallrat nuk mund të transportohen dhe qarkullimi është i pamundur: “Me makinë s’kalohet fare, edhe në këmbë mezi kalojmë. Jemi me blegtori e me barrë në krah.”
Disa banorë raportuan se situata prek edhe më shumë fshatra: “Ka 25 fshatra të bllokuar, njerëzit nuk kalojnë dot. Nusja ime iku me djalin nga Psar i Zi.”
I kontaktuar nga media, nënprefekti i Kolonjës, Adriatik Braçe, deklaroi se është hartuar një projekt inxhinierik që synon zgjidhjen përfundimtare të problemit. Deri në realizimin e tij, nuk përjashtohet vendosja e një ure të tipit Bel nga Forcat e Armatosura për të rikthyer lëvizjen.
Shembja e urës së Qafëzezit është kthyer në emergjencë infrastrukturore, duke vënë në vështirësi qindra banorë të zonës, të cilët kërkojnë zgjidhje të menjëhershme nga autoritetet.
