Ministrja e Arsimit, Mirela Kumbaro, ka zhvilluar një vizitë në mjediset e Universitetit “Fan Noli” në Korçë, ku mori pjesë në një bisedë të hapur lidhur me sfidat e ndërkombëtarizimit dhe ndryshimet e pritshme në ligjin e Arsimit të Lartë.
Gjatë kësaj vizite, ku shoqërohej nga kryetari i Kuvendit, Niko Peleshi, ministrja Kumbaro u prit nga rektori i Universitetit “Fan Noli”, Lorenc Ekonomi, si dhe nga dekanët e fakulteteve të këtij institucioni akademik.
Ndërkombëtarizimi dhe zhvillimi i profileve shkencore
Në fokus të bisedës ishin reformat me interes për arsimin e lartë, si dhe roli që pritet të luajë hapja e Liceut Francez të Korçës. Sipas ministres, ky institucion arsimor do të ushqejë në mënyrë të drejtpërdrejtë linjën e studimeve universitare në profilet teknike dhe shkencore.
