Dy persona kanë humbur jetën në shtetin e Michiganit në Shtetet e Bashkuara të Amerikës, si pasojë e ndërlikimeve të shkaktuara nga ciklosporiaza. Këto janë viktimat e para të konfirmuara nga një shpërthim masiv i këtij infeksioni të zorrëve, i cili ka regjistruar mbi 18 mijë raste në të gjithë vendin që nga fillimi i sezonit, një shifër kjo dukshëm më e lartë krahasuar me vitet e kaluara.
Sipas autoriteteve shëndetësore amerikane, vetëm në shtetin e Michiganit janë regjistruar mbi 11.200 raste të infektimit, ndërsa afro 200 persona janë shtruar në spital për të marrë ndihmë mjekësore. Zyrtarët sqaruan se të dy viktimat vuanin paraprakisht nga probleme serioze shëndetësore. Ata theksuan se dehidratimi i shkaktuar nga diarreja ka të ngjarë të ketë përkeqësuar gjendjen e tyre klinike, duke çuar në pasoja fatale.
Çfarë është ciklosporiaza dhe si transmetohet infeksioni
Ciklosporiaza është një infeksion i zorrëve i shkaktuar nga paraziti mikroskopik Cyclospora cayetanensis. Ky parazit mund të kontaminojë frutat, perimet e freskëta dhe ujin e pijshëm. Ekspertët theksojnë se sëmundja nuk transmetohet drejtpërdrejt nga personi në person, por përhapet kryesisht përmes konsumimit të ushqimeve ose ujit të kontaminuar.
Simptomat më të zakonshme të këtij infeksioni përfshijnë diarre të rëndë dhe të zgjatur, dhimbje barku, të përziera, humbje të oreksit, lodhje dhe në disa raste edhe ethe. Nëse lihet pa trajtim mjekësor, infeksioni mund të zgjasë për disa javë. Rreziku më i madh mbetet dehidratimi, i cili kërcënon veçanërisht të moshuarit, personat me imunitet të dobësuar dhe pacientët që vuajnë nga sëmundje kronike.
Foto: Euronews Albania
