Ish-gjyqtari anglez Anthony Taylor është emëruar drejtor i gjyqtarëve elitarë në Federatën Turke të Futbollit (TFF), pas tërheqjes së tij nga arbitrimi aktiv në përfundim të një karriere 20-vjeçare.
Emërimi i tij në këtë pozicion drejtues u konfirmua zyrtarisht nga firma ligjore Trinity Chambers, e cila e përfaqësoi gjatë procesit të rekrutimit. Në rolin e tij të ri, Taylor do të drejtojë zhvillimin strategjik dhe teknik të arbitrimit elitar në Turqi, me synimin kryesor forcimin e programit kombëtar sipas standardeve të kërkuara nga UEFA dhe FIFA.
“Jam i kënaqur që marr këtë rol të ri”, deklaroi Taylor pas zyrtarizimit të marrëveshjes. Ndërkohë, avokati Fraser Williamson vlerësoi arritjet e gjyqtarit anglez në fushën e blertë, duke theksuar se përvoja e tij e gjatë përbën një mundësi të rëndësishme për zhvillimin e mëtejshëm të arbitrimit elitar në futbollin turk.
Karriera e gjatë dhe tërheqja nga arbitrimi
Taylor, i cili është 47 vjeç, njoftoi muajin e kaluar tërheqjen përfundimtare nga arbitrimi. Ai mbylli kështu një karrierë të pasur ku drejtoi 668 ndeshje profesionale vendase dhe mori pjesë në kompeticione të mëdha ndërkombëtare, duke përfshirë Euro 2020 si dhe Kupat e Botës FIFA 2022 dhe 2026.
Foto: Euronews Albania
