Mbi 30 mijë persona kanë dalë nga Shqipëria përmes pikës së kalimit kufitar të Kapshticës gjatë katër ditëve të fundit, me përfundimin e periudhës kryesore të pushimeve verore. Ky fluks i lartë lëvizjesh përbëhet kryesisht nga emigrantë shqiptarë, të cilët pasi kanë kaluar pushimet pranë të afërmve, kanë nisur rikthimin drejt Greqisë dhe vendeve ku jetojnë e punojnë.
Pritje deri në dy orë në doganë
Fluksi i dendur i mjeteve ka shkaktuar radhë të gjata automjetesh në këtë pikë kufitare të rrethit të Devollit, ku udhëtarët raportojnë kohë pritjeje që arrijnë deri në dy orë. Situata rëndohet më tej nga temperaturat e larta të këtyre ditëve, ndërsa radhët e automjeteve shtrihen edhe në hapësirën e territorit neutral mes dy vendeve.
Me qëllim përshpejtimin e procedurave dhe shmangien e vonesave të mëtejshme, në të dyja anët e kufirit po punohet me nga katër sportele paralelisht për përpunimin e dokumenteve të udhëtarëve dhe mjeteve. Pika kufitare e Kapshticës mbetet një nga akset kryesore të lëvizjes për banorët dhe emigrantët e qarkut të Korçës, ndërsa fluksi i lartë i daljeve parashikohet të vijojë edhe në ditët në vijim.
