Një 42-vjeçar shqiptar i identifikuar si Elvis Metvelaj është ndaluar nga karabinierët italianë në portin e Barit, i dyshuar për përfshirje në vdekjen e partneres së tij, 46-vjeçares Ornella Forastefano, e cila u braktis me plagë të rënda pranë spitalit të Trebisacce rreth orës 3 të mëngjesit të 16 gushtit.
Hetimet e prokurorisë dhe ndalimi në portin e Barit
Sipas të dhënave nga mediat italiane, viktima u gjet me dëmtime të shumta në trup te dera e urgjencës në spitalin e Trebisacce, por për shkak të plagëve të rënda mjekët nuk mundën t’ia shpëtonin jetën. Pas ngjarjes së ndodhur në qytezën e Amendolara në provincën e Kozencës, hetimet e Prokurorisë së Castrovillarit u përqendruan menjëherë te partneri i saj. I dyshuari ishte larguar nga banesa, mirëpo autoritetet arritën ta lokalizojnë në portin e Barit teksa po përgatitej të hipte në traget për t’u larguar nga Italia.
E kaluara e të dyshuarit dhe hetimet e mëtejshme
Nga të dhënat paraprake rezulton se 42-vjeçari Metvelaj kishte jetuar për disa vite në zonën e Kalabrisë dhe kishte një marrëdhënie me viktimën, ndonëse familja e 46-vjeçares nuk e miratonte këtë lidhje. Hetuesit po punojnë për të sqaruar plotësisht rrethanat dhe dinamikën e ngjarjes, ndërsa i dyshuari po merret në pyetje nga autoritetet kompetente. Po ashtu, bëhet e ditur se në vitin 2020 ai kishte qenë i arrestuar më parë lidhur me një çështje të trafikimit të lëndëve narkotike.
