Një 42-vjeçar me origjinë shqiptare është ndalohet nga autoritetet italiane në portin e Barit, nën dyshimin se ka dhunuar për vdekje partneren e tij, Ornella Forastefano, 46 vjeçe. I dyshuari u lokalizua teksa po bëhej gati të hipte në një traget me destinacion Shqipërinë, pak kohë pasi trupi i pajetë i gruas u gjet përpara urgjencës së spitalit në Trebisacce.
Dinamika e ngjarjes dhe gjetja e viktimës
Ngjarja e rëndë u regjistrua rreth orës 03:00 të mëngjesit, kur mjekët e spitalit gjetën 46-vjeçaren të braktisur jashtë hyrjes së urgjencës. Pavarësisht ndërhyrjes së menjëhershme të personelit mjekësor, plagët e rënda dhe dëmtimet e shumta në pjesë të ndryshme të trupit rezultuan fatale për Forastefanon. Sipas të dhënave paraprake nga hetuesit, shenjat e dhunës në trupin e viktimës ngritën dyshime të forta për një sulm brutal.
Pas konstatimit të vdekjes, policia u vu në kërkim të partnerit të saj, i cili nuk u gjet në banesën ku çifti bashkëjetonte prej rreth një viti. Hetimet e shpejta bënë të mundur lokalizimin e tij në portin e Barit. Autoritetet italiane bëjnë me dije se 42-vjeçari ishte një person i njohur më parë për drejtësinë, kryesisht për vepra penale që lidhen me trafikun e lëndëve narkotike.
Hetimet nga Prokuroria e Castrovillarit
Aktualisht, Prokuroria e Castrovillarit po drejton hetimet për të zbardhur rrethanat e plota të ngjarjes dhe për të përcaktuar shkallën e përgjegjësisë së të ndaluarit. Ende mbetet e paqartë nëse ishte vetë partneri ai që e dërgoi gruan në spital përpara se ta braktiste në hyrje, apo nëse në ngjarje janë përfshirë persona të tjerë.
Viktima, Ornella Forastefano, ishte një figurë e njohur në komunitetin e Trebisacces, ku menaxhonte një bar në qendër të qytetit së bashku me dy fëmijët e saj. Ndërkohë, i dyshuari po merret në pyetje nga hetuesit për të rindërtuar dinamikën e asaj që ndodhi brenda banesës përpara se 46-vjeçarja të përfundonte pa ndjenja në dyert e spitalit.
