Kabineti qeveritar po zhvillon në Pogradec ditën e dytë të takimit të zgjeruar të punës, ku në qendër të diskutimeve janë prioritetet e ministrive, reformat institucionale dhe ecuria e procesit të integrimit europian. Takimi ka nisur me fjalën hyrëse të kryeministrit Edi Rama dhe vijon me prezantimet e detajuara të anëtarëve të qeverisë sipas sektorëve përkatës.
Prezantimi i objektivave nga ministritë kryesore
Gjatë pjesës së parë të ditës, anëtarët e kabinetit po paraqesin arritjet dhe synimet kryesore për sektorët që mbulojnë, me një format të përcaktuar prej 10 minutash prezantim dhe 5 minutash diskutim për secilin. Ndër raportimet kryesore përfshihen ato të Ministrisë së Ekonomisë dhe Inovacionit të drejtuar nga Delina Ibrahimaj, Ministrisë së Infrastrukturës dhe Energjisë nga Enea Karakaçi, si dhe Ministrisë së Bujqësisë dhe Zhvillimit Rural nga Andis Salla.
Në këtë bllok përfshihen gjithashtu prezantimet e Ministrit të Shtetit për Pushtetin Vendor, Ervin Demo, Ministrit të Turizmit, Kulturës dhe Sportit, Blendi Gonxhja, Ministres së Shëndetësisë dhe Mirëqenies Sociale, Evis Sala, si dhe drejtuesve të tjerë të dikastereve të mbrojtjes, drejtësisë, financave dhe arsimit.
Fokusi te diplomacia, integrimi dhe administrata
Gjatë orëve të pasdites, axhenda e punimeve përqendrohet në diplomaci dhe proceset integruese, me raportimet e Ministrit për Europën dhe Punët e Jashtme, Ferit Hoxha, si dhe Ministres së Shtetit dhe Kryenegociatores, Majlinda Dhuka. Diskutimet vijojnë më tej me çështjet e administratës publike dhe antikorrupsionit përmes Adea Pirdenit dhe Besfort Lamallarit, si dhe marrëdhëniet me Parlamentin të prezantuara nga Erjona Ismaili.
Pjesa përmbyllëse e takimit përfshin trajtimin e problematikave të proceseve të prokurimeve për periudhën janar–gusht 2026, raportimin e masave të Agjendës së Reformave, si dhe aktivitetet e komunikimit institucional, përpara se takimi të mbyllet me diskutime të hapura dhe fjalën përfundimtare të kryeministrit.
