Edicioni i tretë i festivalit “Korça Serenights” do të zhvillohet nga 17 deri më 20 shtator në disa nga hapësirat më karakteristike të qytetit të Korçës, duke sjellë katër net me muzikë tradicionale, promovim të turizmit lokal dhe degustim të pijeve artizanale.
Ndryshimi i formatit dhe hapësirat e reja të festës
Për dallim nga vitet e kaluara, aktiviteti nuk do të përqendrohet në një skenë të vetme, por do të shtrihet në pika të ndryshme historike si Bashta “Themistokli”, sheshi i Mitropolisë, rrugicat karakteristike dhe Pazari i Vjetër, i cili shërben si zemra turistike e qytetit. Organizatorët synojnë ta kthejnë serenatën në mjedisin e saj natyral mes qytetarëve dhe vizitorëve.
Drejtoresha e Qendrës së Artit dhe Kulturës, Blerta Belliu, u shpreh për këtë organizim: Këtë vit jemi në edicionin e tretë të ‘Netëve të Serenatës’, një festival i cili është në ADN-në e këtij qyteti, është një trashëgimi, është një histori dhe është një nga simbolet më të bukura të këtij qyteti. Dhe prandaj unë me shumë krenari e them që ky është festivali ndoshta më i bukur i vitit. Këtë vit do të kemi disa gjëra të reja nga ato që kemi pasur nga vitet e kaluara.
Programi artistik sipas netëve dhe pjesëmarrësit
Nata e parë e festivalit do të hapet te Bashta “Themistokli” me performance nga “Dixie Band”, ku pjesë do të jetë Bledi Kaso bashkë me artistë të rinj. Nata e dytë në sheshin e Mitropolisë do të mbledhë emra të njohur si Mihallaq Andrea, Ermira Kola, Tomi Kondakçi, Flavia Zere dhe Erika Ahmeti.
Në natën e tretë, të titulluar “Puro Korçare”, muzika do të interpretohet në mënyrë tradicionale me fizarmonikë dhe kitarë në një prej rrugicave pas Mitropolisë. Nata e katërt do të zhvillohet në Pazar me pjesëmarrjen e këngëtarëve Eli Fara dhe Aurel Thellimi. Në konceptimin artistik të mbrëmjeve po kontribuon edhe muzikologu Josif Minga.
Promovimi i turizmit dhe koncerti vizual në pedonale
Përveç pjesës muzikore, çdo natë përpara orës 20:00, Zyra e Turizmit do të prezantojë paketa informuese për bizneset, artizanët, muzetë dhe galeritë e qarkut. Po ashtu, pjesëmarrësit do të kenë mundësi të degustojnë pije artizanale të prodhuara në zonë.
Një risi e veçantë e këtij edicioni do të jetë një koncert vizual që do të shfaqet në pedonalen e qytetit gjatë katër netëve, për 2 orë çdo mbrëmje. Në një ekran gjigant do të transmetohen materiale arkivore me zërat e artistëve që nuk jetojnë më apo të atyre që e kanë të pamundur të ngjiten në skenë due shërbyer si homazh për kontributin e tyre në serenatën korçare.
