Asociacioni i Gazetarëve të Shqipërisë (AGSH) ka reaguar me një deklaratë publike pas incidentit të ndodhur në Maliq, ku gazetarët që po mbulonin një protestë u përballën me fyerje, pengim dhe dhunë fizike gjatë kryerjes së detyrës.
Ndërprerja e intervistave dhe përplasja në terren
Ngjarja u regjistrua në momentin kur gazetarët po merrnin prononcime nga qytetarët e pranishëm. Sipas njoftimit të AGSH-së, organizatori i protestës, Arjan Asimi, ndërhyri duke ndërprerë intervistat dhe duke përdorur gjuhë urrejtjeje ndaj ekipeve të medias. Situata degradoi në përplasje fizike, çka i detyroi gazetarët të ndërpresin punën për arsye sigurisë dhe t’i drejtohen më pas Policisë së Shtetit për të bërë denoncimin përkatës.
Qëndrimi i AGSH-së dhe thirrja për autoritetet
Përmes një reagimi zyrtar, AGSH e dënoi ashpër goditjen ndaj punonjësve të medias: “AGSH e konsideron të papranueshme çdo formë intimidimi, fyerjeje, kërcënimi apo dhune ndaj gazetarëve, pavarësisht se nga kush ushtrohet ajo dhe pavarësisht bindjeve apo përkatësive politike të personave të përfshirë.”
Gjithashtu, organizata theksoi se e drejta e tubimit nuk mund të cenojë lirinë e informimit: “Protesta është një e drejtë demokratike, por po aq themelore është e drejta e gazetarëve për ta raportuar atë lirisht, pa u penguar, fyer apo sulmuar. Pakënaqësia ndaj mënyrës se si një media raporton nuk mund të shërbejë në asnjë rrethanë si justifikim për agresion ndaj punonjësve të medias.”
AGSH u bëri thirrje autoriteteve ligjzbatuese që të dokumentojnë të gjithë ngjarjen dhe të marrin masat e parashikuara ligjore ndaj përgjegjësve, ndërsa u kërkoi organizatorëve të aktiviteve publike të garantojnë mjedis të sigurt për punën e gazetarëve.
