Policia e Pogradecit ka nisur procedimin penal ndaj tre mjekëve të maternitetit të qytetit për veprën penale “Neglizhenca në trajtimin mjekësor”, pas vdekjes së 36-vjeçares shtatzënë Marjana Karolina Bunaj gjatë transportimit të saj drejt spitalit. Ngjarja ka ndodhur mbrëmjen e 30 gushtit 2026, kur 36-vjeçarja, e cila ishte në muajin e shtatë të shtatzënisë, u paraqit në maternitetin e Pogradecit në gjendje jo të mirë shëndetësore.
Dinamika e ngjarjes dhe nisja drejt spitalit
Sipas njoftimit zyrtar të policisë, pas ekzaminimit mjekësor në maternitetin e Pogradecit, 36-vjeçarja është nisur me autoambulancë drejt Tiranës për ndihmë më të specializuar mjekësore. Gjatë transportimit, gjendja e saj shëndetësore është përkeqësuar, me ç’rast autoambulanca është devijuar për në spitalin e Elbasanit, ku edhe u konstatua vdekja e saj. Familjarët e të ndjerës kanë ngritur pikëpyetje për mënyrën e menaxhimit të situatës shëndetësore në maternitet dhe kanë kërkuar zbardhjen e plotë të rrethanave të ngjarjes, për të cilën portali ynë ka raportuar edhe më parë pas kërkesës së tyre për hetim.
Procedimi penal ndaj tre mjekëve në Prokurorinë e Korçës
Specialistët për Hetimin e Krimeve të Komisariatit të Policisë Pogradec kanë referuar materialet në Prokurorinë e Korçës, ku ka nisur procedimi penal në gjendje të lirë për tre mjekët që kryen ekzaminimin e pacientes. Personat ndaj të cilëve ka nisur procedimi janë mjekët Blerta Delija, 35 vjeçe, banuese në Elbasan, Anri Topi, 40 vjeç, dhe Saimir Çela, 34 vjeç, të dy banues në Pogradec. Çështja i është kaluar organit të akuzës për veprime të mëtejshme hetimore.
Foto ilustruese.
