Projekti për ndërtimin e një zipline në fshatin turistik të Dardhës në Korçë, i prezantuar nga bashkia në maj të vitit 2024, aktualisht ka mbetur vetëm në fazën e një kantieri të papërfunduar me disa struktura metalike dhe një tabelë informuese.
Prej rreth katër muajsh, në pikën ku duhej të ngrihej ky atraksion i ri turistik, ajo që shihet në terren është vetëm tabela e projektit dhe një kantier i ngritur përgjysmë. Ky projekt është pjesë e një kontrate më të gjerë me vlerë 3 milionë e 368 mijë euro, e cila parashikon ndërhyrje në fshatrat Dardhë, Arrëz, Sinicë dhe Nikolicë.
Për komponentin e emërtuar Dardha Zipline janë parashikuar 459 mijë e 990 euro pa TVSH. Sipas të dhënave në tabelë, afati për përfundimin e kësaj pjese është 360 ditë, ndërsa për kontratën në tërësi afati është 520 ditë.
Ndonëse kompania zbatuese është përcaktuar dhe fondet janë alokuar, punimet në terren duken ende në hapat e parë, duke bërë që projekti i premtuar për pasurimin e turizmit të aventurës të mbetet hëpërhë vetëm në hekura.
