Një burrë 41-vjeçar është arrestuar në qytetin Criciúma të shtetit Santa Catarina në Brazil, nën akuzën për tentativë vrasjeje ndaj tre arbitrave të një ndeshjeje futsali për fëmijë nën moshën 10 vjeç. Ngjarja e rëndë, e cila fatmirësisht përfundoi pa të lënduar fizikisht, nisi pas një debati për rregulloren e lojës gjatë një turneu lokal.
Sipas autoriteteve vendase, konflikti nisi në minutën e shtatë të ndeshjes, kur trupa e gjyqtarëve kërkoi që portieri i njërit prej ekipeve të hiqte vathin që mbante në vesh, siç e parashikon rregullorja e sigurisë. Kjo kërkesë shkaktoi reagimin e ashpër të babait të njërit prej fëmijëve në stol. Pasi ofendoi arbitrat, ai u nxor jashtë sallës nga të pranishmit, por u kthye më vonë me automjetin e tij për të pritur përfundimin e takimit.
Të shtënat ndaj makinës së arbitrave
Në momentin kur tre gjyqtarët po i afroheshin makinës së tyre, i dyshuari i kërcënoi dhe hapi zjarr në drejtim të automjetit. Ndonëse asnjë prej zyrtarëve të ndeshjes nuk pësoi lëndime fizike, ata pësuan një gjendje të rëndë shoku psikologjik. Policia ndërhyri me shpejtësi duke lokalizuar dhe prangosur 41-vjeçarin, i cili po përpiqej të ndërronte mjetin për t’u arratisur. Gjatë arrestimit, atij iu sekuestruan arma e zjarrit, municione dhe një sasi parash.
Gjyqësori brazilian e ka regjistruar çështjen si tentativë për vrasje të cilësuar për motive banale dhe ka caktuar masën e sigurisë “arrest në burg” për të dyshuarin. Pas incidentit, Sindikata e Gjyqtarëve të Futbollit të Santa Catarina-s (SINAFESC) dhe Federata Lokale e Futsalit (FCFS) dënuan ashpër sulmin, duke deklaruar se asnjë mosmarrëveshje sportive nuk mund të justifikojë dhunën dhe kërcënimet me armë ndaj zyrtarëve.
