Kushtet e amortizuara të Maternitetit të Pogradecit kanë përfunduar në qendër të vëmendjes publike, pas ngjarjes së rëndë ku një 36-vjeçare shtatzënë humbi jetën pak ditë më parë. Godina e këtij institucioni shëndetësor paraqitet larg standardeve të kërkuara për trajtimin e nënave dhe fëmijëve, duke ngritur pikëpyetje të forta mbi sigurinë e shërbimit obstetrik në qytet.
Sipas pamjeve të bëra publike nga mediat, ambientet e maternitetit vuajnë nga një amortizim i thellë, ku përfshihen dyer dhe dritare të dëmtuara, si dhe shtretër mjaft të vjetër. Ky institucion, i cili funksionon në një godinë të vjetër, disponon kryesisht pajisje për ekzaminime bazë, ndërsa mungesa e një infrastrukture moderne dhe e kapaciteteve të plota diagnostikuese mbetet një problem serioz për përballimin e rasteve urgjente.
Hetimet dhe nevoja për ndërhyrje në maternitet
Ndërsa hetimet për të zbardhur rrethanat e vdekjes së 36-vjeçares shtatzënë janë ende në vijim, mbetet për t’u parë nëse institucionet përgjegjëse do të përfshijnë në vlerësimin e tyre edhe gjendjen e infrastrukturës dhe kapacitetet e këtij materniteti. Nevoja për ndërhyrje konkrete në këtë godinë mbetet emergjente për të garantuar sigurinë e jetës së nënave dhe të porsalindurve në Pogradec.
