Banorët dhe aktivistët në Maliq kanë zhvilluar një tjetër protestë kundër planit për riorganizimin e ri territorial, i cili parashikon shkrirjen e kësaj bashkie dhe bashkimin e saj me Bashkinë e Korçës.
Pjesëmarrësit e pranishëm u shprehën kundër këtij projekti, duke theksuar se ai dëmton drejtpërdrejt të ardhmen administrative, ekonomike dhe përfaqësimin e komunitetit lokal. Organizatorët shprehën keqardhjen për pjesëmarrjen e kufizuar në shesh, duke pretenduar se kjo vjen si pasojë e presionit dhe klimës së frikës së krijuar nga struktura të pushtetit. Kjo pason tubimet e mëparshme të mbajtura në këtë qytet lidhur me të njëjtën çështje.
Kërkesa për deputetët dhe paralajmërimi për tubime
Gjatë fjalimeve të mbajtura në tubim, organizatorët kërkuan reagim nga i gjithë qyteti: “Shkrirja e Bashkisë Maliq do të ndikojë drejtpërdrejt në të ardhmen e qytetit dhe të banorëve tanë. Mos të heshtim përballë këtij vendimi! Banorët duhet të kapërcejnë frikën dhe të dalin publikisht kundër ndryshimit të propozuar territorial.”
Protestuesit drejtuan akuza ndaj drejtuesve të pushtetit vendor dhe deputetëve që mbulojnë zonën, duke u kërkuar zyrtarëve të dalin publikisht për të sqaruar qëndrimin e tyre mbi heqjen e mundshme të Maliqit nga harta si bashki më vete. Aktivistët theksuan se aksioni qytetar do të vijojë me protesta të tjera në ditët në vazhdim.
