Një situatë e rëndë sociale po rëndon mbi një familje në qytetin e Korçës, ku nëna e një vajze 17-vjeçare ka kërkuar mbështetje institucionale për rehabilitimin e të miturës nga varësia ndaj lëndëve narkotike dhe sjelljet agresive të shfaqura brenda shtëpisë.
Traumat e hershme dhe përshkallëzimi i problemeve
Sipas dëshmisë së nënës në emisionin investigativ „Stop“ në Tv Klan, gjendja e rënduar e vajzës nisi që në moshën 13-vjeçare, kur ajo denoncoi një bashkëmoshatar për marrëdhënie me forcë, person i cili aktualisht vuan dënimin në burgun e të miturve në Kavajë. Kjo ngjarje dhe përfshirja në shoqëri problematike sollën pasoja të thella psikologjike, duke bërë që rreth moshës 14 vjeç e mitura të niste konsumimin e kokainës dhe të shfaqte episode të vazhdueshme agresiviteti.
Apeli për shërbim mjekësor dhe psikologjik
E mitura, e cila është rritur nga nëna dhe gjyshërit ndërsa babai i saj ndodhet në burg për dhunë në familje, ka ushtruar vazhdimisht presion e dhunë ndaj familjarëve për sigurimin e parave. Pas një incidenti të fundit ku u njoftua policia, nëna e saj theksoi se nuk dëshiron masa penale ndaj të bijës, por kërkon me ngulm ndihmën e psikologëve dhe sistemimin e saj në një qendër rehabilitimi.
Nga ana tjetër, gjatë një komunikimi të regjistruar, 17-vjeçarja pranoi përdorimin e lëndëve narkotike dhe qëndrimin për 5 ditë larg banesës, teksa u shpreh e gatshme për t’iu nënshtruar një kure mjekësore dhe rehabilituese në Tiranë.
