“Shikojini pak…
Janë Saliu dhe Iliri, dy ish presidentë, dy ish kryeministra dhe liderë të gjithëpushtetshëm që për 30 vjet kanë sunduar skenën politike. Janë dy individë që sipas orekseve herë janë puthur e herë janë pështyrë derisa tani për hallet e tyre personale kanë bërë pazarin e radhës.
Dje i ra rruga për në Devoll ku nxorën në skenë një dordolec me kostum (jo kostumin e burgut) dhe i thanë disa militantëve që ta votojnë këtë falsifikator të dënuar për ta rikthyer në bashki ku ka qenë para katër vitesh duke e parë si shembull që duhet ndjekur nga fëmijët. E në fakt, për të qeshur e për të qarë, nxorën edhe një listë të gjatë premtimesh që sikur të mos i kishin pasur të gjithë pushtetet në dorë, edhe unë do t’i besoja.
Devolli nuk i harron kurrë fytyrat e atyre që e braktisën për vite me radhë duke e trajtuar veç si hambar që i duhej për vota, duke i sjellë po të njëjtën nuse për të nusëruar.
Devolli nuk i harron kurrë fytyrat e atyre që e zhvatën për orekse biznesesh për të ngritur saraje sa në Bilisht, sa në Selanik, sa në Tiranë, me vila, karburante, parqe fotovoltaike, pikagrumbullimi, pallate, farmaci, etj në kurriz të popullit të varfër të Devollit.
Devolli nuk i harron kurrë fytyrat e atyre që paradite bëjnë sikur i digjet shpirti dhe natën numërojnë milionat duke dashur t’i trajtojnë devollinjtë si arka mollësh që mendojnë se mund t’i fusin në frigorifer dhe t’i nxjerrin prej aty kur i duhen.
Devolli nuk ja harron kurrë Saliut e Ilirit, e aq më tepër nuk ja harron dy ish drejtuesve të bashkisë, sepse as i gjithë lumi i Devollit nuk ua lan dot mëkatet.
Kaq për sot, më 14 maj do të keni tjetër përgjigje, por jo nga unë, veç nga VOTA E POPULLIT TË DEVOLLIT! “
ka shkruar kandidati i Partisë Sociaiste në bashkinë e Devollit, Eduard Duro, njëkohësisht edhe kryetari aktual i bashkisë.
