Andonaq Risto ka shpallur zyrtarisht kandidaturën e tij për deputet në zgjedhjet e ardhshme parlamentare për Qarkun Korçë, nën siglën e Partisë SocialDemokrate (PSD) me kryetar Tom Doshi. Ai deklaroi se e merr këtë përgjegjësi me përkushtim të lartë ndaj interesave dhe nevojave të qytetarëve.
Risto është lindur dhe rritur në fshatin Terovë, Njësia Administrative Pojan, pranë Bashkisë Maliq. Ai ka përfunduar studimet e larta në Universitetin “Fan S. Noli”, në programin Bachelor.
Me një përvojë pune 20-vjeçare, brenda dhe jashtë vendit, Risto është shprehur se suksesi dhe përkushtimi në aktivitetin që drejton kanë qenë shtysë për t’u angazhuar edhe në politikë.
Nga viti 2011, ai është zgjedhur kryetar i fshatit Terovë, post të cilin e mban edhe sot. Prej vitit 2023, Risto është anëtar i Këshillit Bashkiak të Maliqit, si përfaqësues i Partisë SocialDemokrate. Ai është njohur nga afër me problematikat e komunitetit dhe është përpjekur të ofrojë zgjidhje për to.
“Nuk prezantohem vetëm si kandidat për deputet, por mbi të gjitha si prind i dy fëmijëve. Familja është gjëja më e shenjtë për mua dhe mbështetja e tyre më jep forcë për të vazhduar këtë rrugëtim,” u shpreh Risto. Ai theksoi se synon të jetë një zë i fuqishëm për komunitetin, duke u angazhuar për një realitet më të drejtë dhe të sigurt për të gjithë qytetarët.
“Vota juaj nuk është thjesht një zgjedhje, por një mundësi për të ndërtuar një të ardhme më të begatë dhe të drejtë për komunitetin tonë,” tha Risto në përfundim të deklaratës së tij.
