Teksa halloween merr vëmendje botërore, ne kemi “festat” tona lokale me maska të frikshme por edhe kuptimplota. Ruajtur me fanatizëm brez pas brezi, “Dita e rrogeçëve” është riti qindravjecar që bën bashkë të rinj dhe të reja, veshur me kostume tradicionale dhe maska, duke sjellë atmosferën e bukur të Karnavaleve të fshati Pojan në Maliq.
Çdo vit pas ditës së ujit të bekuar, më 7 janar, banorët e Pojanit organizojnë karnavalet e tyre, një traditë kjo e lashtë, që ka nisur herët në këtë zonë dhe që është ringjallur sërish pas ardhjes së demokracisë.
Plaku, plaka, dhëndri, nusja dhe doktori të shoqëruar gjatë gjithë kohës me këmborët dhe muzikë janë elementë unikë të këtyre karnavaleve, të cilat herë pas here u shtohen personazhe të reja në varësi edhe të situatave aktuale.
Këtë vit në karnavalet e Pojanit kishte përfaqësues edhe nga Kosova, që kultivojnë dhe promovojnë kulturën dhe qytetërimin iliro-pellazg.
Organizatorët shpresojnë dhe apelojnë që kjo traditë të marrë edhe më shumë vëmendjen e autoriteteve lokale dhe ministrisë së kulturës me qëllimin promovimin e mëtejshëm të vlerave dhe kulturës së zonës.
