Avioni Air Tractor AT-833 ka nisur operacionet e para për shuarjen e zjarreve në Mallakastër, duke shënuar testimin e tij fillestar para se flota prej 3 avionëve t’i bashkohet Forcës Ajrore Shqiptare në fund të vitit.
Sipas burimeve, mjeti ajror i mbërritur të martën po drejtohet aktualisht nga pilotët e kompanisë kontraktore, ndërsa në ditët në vijim pritet të mbërrijë edhe një avion i dytë. Ky proces synon stërvitjen e pilotëve shqiptarë, të cilët do të marrin në dorëzim përdorimin e këtyre mjeteve të specializuara, pas kontratës së lidhur nga qeveria shqiptare për blerjen e tyre.
Zjarret në Mallakastër dhe monitorimi me dronin Bayraktar
Lufta me flakët vijon prej 2 ditësh në fshatin Riban të Mallakastrës. Gjatë natës, zjarri është përhapur drejt masivit pyjor të Lofkëndit dhe fshatit Ngraçan. Për shkak të terrenit të thepisur, bimësisë së dendur dhe erës, ndërhyrja e forcave në tokë mbetet shumë e vështirë.
Në këtë operacion po marrin pjesë edhe helikopterë të Forcës Ajrore, si dhe droni Bayraktar, i cili po përdoret për zbulimin dhe monitorimin e vatrave të zjarrit. Banorët që u evakuuan një ditë më parë janë rikthyer në banesat e tyre. Ndërkohë, sipas të dhënave paraprake, flakët kanë djegur rreth 15 hektarë sipërfaqe pyjore.
Foto: Shqiptarja.com
