Një projekt i cili kur nisi, pakkush do e mendonte seriozitetin që do të merte.
Ky ishte projekti i bletarritësve të rinj, një nismë e iniciuar nga këshilli i qarkut Korçë që me pas gjeti mbështetje nga aktorë të tjerë
Sot në prezencë të ministres së bujqësisë Anila Denaj, ambasadorit turk në Shqipëri dhe drejtuesve të bashkisë e prefekturës, ishte vet kryetari i këshillit të qarkut ai i cili tregohemi për rëndësinë e këtij projekti
Ky ishte fjalimi i tij
Fjalimi për eventin përmbyllës të projektit
I nderuar Ambasador i Republikës së Turqisë në Shqipëri, Z. Tayyar Kağan Atay,
E nderuar Ministre e Bujqësisë dhe Zhvillimit Rural, Znj. Anila Denaj,
I nderuar përfaqësues i Agjencisë Turke për Koordinim dhe Bashkëpunim, Z. Mustafa Ata,
I nderuar Prefekt
Te nderuar Kryetare
E nderuar Rektore e Universitetit “Fan Noli”
Të nderuar kolege , Te nderuar te ftuar, Te dashur kursante
Kam kënaqësinë të mirëpres të gjithë ju në këtë event përmbyllës të projektit tonë, “Nxitja e të Rinjve në Bujqësi dhe Mbështetja e Bletarisë Moderne në Qarkun e Korçës.” Prania juaj sot është një nder i madh për ne, dhe dëshmon rëndësinë e këtij projekti për zhvillimin e mëtejshëm të rajonit tonë dhe përfshirjen e të rinjve në sektorin e bujqësisë.
Arsyeja kryesore për të cilën zgjodhëm këtë projekt është përparësia që i japim rinisë, si një nga kolonat kryesore të punës së institucionit tonë. Të rinjtë janë themeli i së ardhmes sonë, dhe ne besojmë se investimi në edukimin dhe zhvillimin e tyre është thelbësor për një të ardhme të qëndrueshme dhe të suksesshme. Ky projekt u ofroi të rinjve mundësi per te marre njohuri, për të zhvilluar aftësi, për të fituar përvoja praktike dhe për të ndërtuar shtigje të reja në fushën e bletarisë.
Shtylla të rëndësishme për ne janë bujqësia, inovacioni dhe mjedisi. Ky projekt kombinoi këto elemente në një iniciativë të vetme, duke synuar jo vetëm zhvillimin ekonomik, por edhe mbrojtjen dhe përmirësimin e mjedisit. Bletaria, si një praktikë ekologjikisht e qëndrueshme, kontribuon në ruajtjen e biodiversitetit dhe në përmirësimin e cilësisë së mjedisit. Për më tepër, inovacionet teknologjike në bletari janë thelbësore për përparimin dhe efektivitetin e sektorit.
Fillimisht, projekti u konceptua në kushtet e kufizuara të buxhetit të Këshillit të Qarkut, duke synuar të përfshinte 20 të rinj me koshere të thjeshta, ndoshta pa familjet e bletëve. Në konsultim me drejtues të Shoqatës së Bletarëve të Qarkut Korçë, ju drejtuam TIKA-s në Tiranë. Falë mbështetjes së Agjencisë Turke për Koordinim dhe Bashkëpunim (TIKA), ky projekt u zgjerua ndjeshëm. Numri i të rinjve të përfshirë u rrit, dhe projekti u ngrit në një nivel tjetër në aspektin e pajisjeve dhe teknologjisë. U plotësua me të gjithë elementet e tij dhe krijoi mundësinë për të mbështetur shkollën e mesme profesionale të shërbimeve, në drejtimet e bujqësisë dhe veterinarisë, duke e pajisur me një bazë materiale të konsoliduar.
Trajnimi u zhvillua nga pedagogë të Universitetit Bujqësor të Tiranës dhe pedagogë të Universitetit “Fan S. Noli” në Korçë, të cilët kanë luajtur një rol të rëndësishëm në ofrimin e njohurive dhe përvojave praktike për pjesëmarrësit. Ky bashkëpunim ka qenë thelbësor për të siguruar një nivel të lartë edukimi dhe për të përgatitur të rinjtë për sfidat e sektorit të bletarisë.
Projekti, duke qenë i pari i këtij lloji në rajon, u përball me disa sfida. E para, dhe ndoshta më e rëndësishmja, ishte mbështetja ligjore e kufizuar, veçanërisht në kontekstin e Ligjit të ri për Bletarinë, i cili hyri në fuqi në maj të këtij viti. Ky ligj ofroi një kornizë të re rregullative, por aplikimi dhe përshtatja me të ishte një sfidë për të gjithë aktorët e përfshirë.
Një tjetër sfidë ishte mungesa e përvojës së institucioneve në projekte të këtij lloji. Ekspertiza institucionale ishte e kufizuar duke sjelle vonesa në organizimin dhe zbatimin e projektit. Skepticizmi ishte një tjetër faktor që duhej kapërcyer. Megjithatë, falë bashkëpunimit të të gjithë partnerëve dhe pjesëmarrësve, ne besojmë se kemi arritur të përballojmë këto sfida dhe të realizojmë një projekt të suksesshëm. Pasioni, përkushtimi dhe qëllimi i mirë na ndihmuan ta realizojmë me sukses këtë projekt.
Interesimi për këtë projekt ka qenë i jashtëzakonshëm, me rreth 170 aplikime të pranuara dhe 30 pjesëmarrës të përzgjedhur. Nga këta, 25 do të certifikohen për përpjekjet e tyre dhe 23 prej tyre do të përfitojnë paketën e start-up, duke përfshirë 5 sete koshere te tekonollogjise technoset, veglat e punes se bletarit, materiale ndihmese dhe 5 familje minimale bletesh. Kjo paketë do t’u japë mundësinë të fillojnë aktivitetet e tyre si bletarë dhe të kontribuojnë në zhvillimin e mëtejshëm të bletarisë në rajonin tonë.
Gjithashtu, janë siguruar 35 sete koshere dhe materiale të tjera për të kompletuar bazën prodhuese të Shkollës Profesionale të Shërbimeve. Ne po punojmë për të përfunduar kurikulën e nevojshme, duke synuar të ofrojmë një arsim të specializuar për të rinjtë.
Një falënderim i veçantë, nga zemra, shkon për Agjencinë Turke për Koordinim dhe Bashkëpunim dhe Ambasadën e Republikës së Turqisë në Shqipëri për mbështetjen e tyre të çmuar. Ata i besuan këtij projekti dhe e mbështetën atë, dhe jam i sigurt se kemi hapur rrugën për bashkëpunime të reja në vitet e ardhshme.
Falenderojmë Universitetin Bujqësor të Tiranës dhe Universitetin “Fan S. Noli” në Korçë për trajnimin cilësor dhe mbështetjen e vazhdueshme.
Një falënderim kemi për RTSH Korça që ka qenë media partner i këtij projekti, duke garantuar informimin e publikut.
Një falënderim publik për ekipin e jashtëzakonshëm të institucionit që unë drejtoj tashmë prej një viti, për angazhimin në këtë projekt.
Një vlerësim dhe falenderim për punën që bëjnë bletarët e qarkut tonë, për traditën që kanë krijuar dhe kontributin që japin në ekonominë e rajonit.
Në fund, dua të falenderoj të gjithë ju që keni ardhur sot për të ndarë këtë moment të veçantë me ne. Prania juaj është një motivim i madh për ne, për të vazhduar përpjekjet tona për zhvillimin e rajonit tonë.
Ne shpresojmë që ky event të shërbejë si një pikënisje për projekte të reja dhe bashkëpunime të suksesshme në të ardhmen.
Ju uroj të gjithëve më të mirat dhe suksese në të gjitha përpjekjet tuaja të ardhshme. Faleminderit për vëmendjen dhe mbështetjen tuaj!
Faleminderit!
