Drejtoria Vendore e Kufirit dhe Migracionit Korçë njofton për bllokime dhe kufizime të përkohshme të lëvizjes në dy pika të rëndësishme të kalimit kufitar.
Në Pikën e Kalimit Kufitar Kapshticë, Policia Kufitare Greke ka bërë me dije se më datë 30.12.2025, nga ora 12:00 deri në 16:00 (me orën greke), rruga nacionale “Kapshticë–Selanik” do të jetë e bllokuar për shkak të një proteste të fermerëve grekë. Gjatë kësaj periudhe, lëvizja do të jetë e mundur vetëm nëpërmjet rrugëve dytësore dhe vetëm për automjetet e vogla.
Ndërkohë, në Pikën e Kalimit Kufitar Qafë Thanë, autoritetet e Maqedonisë së Veriut kanë njoftuar se në aksin “Strugë–Qafë Thanë”, rreth 3 km larg doganës maqedonase, një autobot me gaz është përfshirë në një aksident rrugor, duke bllokuar plotësisht qarkullimin.
Si pasojë, lëvizja e mjeteve në dalje nga Shqipëria dhe në hyrje të Maqedonisë së Veriut do të mbetet e bllokuar, deri në hapjen e plotë dhe sigurimin e rrugës për qarkullim normal.
Autoritetet kufitare u bëjnë thirrje qytetarëve të ndjekin njoftimet zyrtare dhe të planifikojnë udhëtimet e tyre në përputhje me këto kufizime.
