Një stuhi e fortë breshëri e rënë një ditë më parë ka shkaktuar dëme të rënda në parcelat bujqësore të fshatrave Dobranj dhe Bracanj në bashkinë Devoll, ku sipas fermerëve vendas mbi 80% e prodhimit të fasules ka shkuar dëm. Reshjet intensive, të cilat zgjatën nga 30 deri në 40 minuta, e goditën prodhimin në fazën e tij të pjekjes, duke rënduar ndjeshëm situatën ekonomike të zonës.
Dëmet e rënda në parcelat e Dobranjit
Situata paraqitet tejet problematike në fshatin Dobranj, ku kultivimi i fasules përbën burimin kryesor të të ardhurave për banorët. Prodhuesit bujqësorë shprehen se stuhia ka asgjësuar të gjithë mundin e këtij sezoni.
Fermeri Bardhi Kaso tregon pasojat e menjëhershme të motit të keq në tokat e tij: Shumë dëm pati. Të gjithë fasulet i shuajti, i hodhi përdhe. Me prodhimet rrojmë ne. Te fasulet e kemi kokën.
Për humbje të mëdha financiare flet edhe Ramadan Zyfi, i cili kultivon rreth 3 hektarë me fasule. Sipas llogaritjeve të tij, dëmtimi arrin në rreth 70% të sipërfaqes së ekspozuar jashtë. Kam 3 hektarë me fasule. Rendimenti ishte rreth 4 kuintalë për dynym, dy u dëmtuan. Rreth 20 kuintalë fasule, rreth 10 milionë lekë të vjetra, u shpreh ai.
Sipërfaqet e goditura dhe verifikimi në terren
Kryeplaku i Dobranjit, Petrika Zyfi, theksoi se sipërfaqja e prekur nga stuhia vlerësohet nga 300 deri në 400 dynymë. Ai sqaroi se goditja ndodhi në një moment kyç për bimën: Ra 40 minuta breshër. 80% e sipërfaqeve janë dëmtuar. Janë në fazën e pjekjes dhe i ka goditur. Unë kisha 15 dynymë, rreth 12 milionë lekë dëm.
Pas raportimeve nga banorët, një grup pune nga Drejtoria e Bujqësisë në Bashkinë Devoll doli në terren në Dobranj dhe Bracanj për të verifikuar e matur shkallën e dëmeve. Të dhënat e administruara nga ky inspektim do t’i përcillen Drejtorisë Rajonale të Ekstensionit Bujqësor për procedurat e mëtejshme. Fermerët e Devollit janë përballur vazhdimisht vitet e fundit me goditje nga reshjet e breshërit, të cilat përveç fasules kanë prekur rregullisht edhe pemëtoret me mollë të rrethit.
