Ministrja e Turizmit dhe Mjedisit, Mirela Kumbaro, ka shpërndarë 700 certifikata të reja pa afat për udhërrëfyesit turistikë, një vendim që synon lehtësimin e burokracive dhe mbështetjen e të rinjve që duan të ndërtojnë një karrierë në fushën e turizmit.
Gjatë një takimi me përfaqësues të udhërrëfyesve turistikë, ministrja deklaroi se tashmë numri total i udhërrëfyesve të certifikuar ka arritur në 932, nga të cilët 691 janë kombëtarë, 120 lokalë dhe 112 të specialiteteve të veçanta.
“Kemi një trupë që është shtuar gati tetë herë në katër vitet e fundit, çka tregon rritjen e interesit për këtë profesion dhe kontributin e tij në gjenerimin e punësimit dhe zhvillimin e zinxhirit të ekonomisë,” tha Kumbaro.
Ministrja theksoi se certifikatat e reja nuk do të kenë më afat skadence, duke eliminuar nevojën për rinovime të përsëritura. “Nuk ka kuptim që një udhërrëfyes t’i nënshtrohet përsëri procedurave burokratike për të rinovuar një certifikatë që e ka fituar me meritë. Ky ka qenë një shqetësim i sektorit dhe sot i japim zgjidhje konkrete,” theksoi ajo.
Aktualisht në vend janë 15 qendra të akredituara që ofrojnë trajnime për të gjitha kategoritë e udhërrëfyesve turistikë – nga ata kombëtarë, tek lokalët dhe specialistët.
Kjo nismë pritet të përforcojë më tej profesionalizimin e sektorit turistik dhe të inkurajojë të rinjtë të angazhohen në promovimin e trashëgimisë kulturore, natyrore dhe ekoturizmit në Shqipëri.
