Në kuadër të Ditës Botërore të Sigurisë Ushqimore 2025, Departamenti i Agroushqimit në Universitetin “Fan S. Noli” organizoi një tryezë të rrumbullakët ku u diskutua rëndësia e ushqimit të sigurt dhe sfidat aktuale në këtë fushë. Në këtë takim morën pjesë përfaqësues të autoriteteve vendore, biznesit ushqimor, pedagogë, studentë dhe aktorë të tjerë të interesuar.
Dekani i Fakultetit të Bujqësisë, prof. as. dr. Besnik Skënderasi, theksoi rolin kyç të bashkëpunimit ndërinstitucional për garantimin e ushqimit të sigurt dhe shëndetit të komunitetit. Ndërkohë, rektori i Universitetit “Fan S. Noli”, prof. dr. Lorenc Ekonomi, nënvizoi se bujqësia dhe siguria ushqimore janë fusha prioritare në vizionin strategjik të universitetit, duke kontribuar drejtpërdrejt në zhvillimin rajonal dhe përmirësimin e cilësisë së jetës.
Përgjegjësja e departamentit të Agroushqimit, dr. Sulltana Ajçe, dhe kryetari i Këshillit të Qarkut Korçë, z. Erion Nexhipi, përshëndetën pjesëmarrësit dhe theksuan përgjegjësinë e përbashkët për sigurimin e ushqimit të shëndetshëm dhe cilësor. Pedagogët dr. Nikolin Karapançi dhe msc. Kristi Morava prezantuan temat “Cilësia dhe Siguria Ushqimore” dhe “Sëmundjet Ushqimore”, duke ofruar njohuri të rëndësishme për auditorin.
Ky takim përfaqëson një platformë të rëndësishme bashkëpunimi dhe reflektimi për të forcuar angazhimin në garantimin e ushqimit të sigurt, që është një parakusht thelbësor për shëndetin publik dhe zhvillimin e qëndrueshëm.
