Në qytetin e Korçës, u çel ekspozita e parë që shënon fillimin e ciklit “Korça KujtON”, dedikuar veprimtarisë dhe jetës së “Piktorit të Popullit” Vangjush Tushi. Ky aktivitet kulturor u mirëprit nga artdashësit dhe banorët e qytetit, të cilët patën mundësinë të shijojnë për herë të parë një koleksion të pasur pikturash nga koleksioni i familjes së artistit, si dhe disa sende personale të tij.
Në ekspozitë u shfaqën disa nga kryeveprat e Tushit, të cilat reflektojnë talentin dhe kontributin e tij të jashtëzakonshëm në artin figurativ shqiptar.
Vizitorët panë nga afër teknikën dhe stilin unik të piktorit, i cili ka lënë një gjurmë të pashlyeshme në kulturën dhe historinë artistike të vendit.
Ekspozita do të jetë e hapur për publikun nga data 4 deri më 8 korrik, duke ofruar një mundësi të rrallë për të gjithë dashamirësit e artit që të njihen nga afër me veprën dhe jetën e Vangjush Tushit.
Së shpejti, cikli “Korça KujtON” do të sjellë një tjetër portret të rëndësishëm të artit figurativ, duke vazhduar kështu traditën e promovimit dhe vlerësimit të figurave të shquara të kulturës shqiptare.
