Fshati turistik Lin në Pogradec po tërheq gjithnjë e më shumë vizitorë të huaj, falë bukurive natyrore, trashëgimisë kulturore dhe zbulimeve arkeologjike që e shpallin si vendbanimin më të vjetër në Europë, me një histori rreth 8,500 vjeçare. Vetëm gjatë 7 muajve të parë të këtij viti, Lin ka pritur mbi 5 mijë turistë, kryesisht nga jashtë vendit, të cilët shfaqin interes të veçantë për bazilikën paleokristiane dhe peizazhin unik pranë liqenit të Pogradecit.
Drejtori i Turizmit në Bashkinë e Pogradecit, Ledjan Zeqollari, thotë se për të huajt, Lini dhe natyra përreth janë një surprizë e këndshme, ndërsa gatimet tradicionale mbeten një përvojë e paharrueshme. Një turist anglez, që vizitoi zonën pas Shën Naumit në Maqedoninë e Veriut, e përshkroi fshatin si “shumë të bukur, edhe pse mjaft të nxehtë për anglezët”, duke vlerësuar bazilikën dhe ushqimin vendas.
Helga Braka, menaxhere e një bujtine në Lin, shprehet se interesi është në rritje dhe vizitorët vijnë nga e gjithë bota, me francezët që zënë numrin më të madh. Sipas saj, natyra, qetësia dhe ajri i pastër janë surprizat më të mëdha për turistët.
Megjithatë, infrastruktura rrugore mbetet një sfidë që kërkon ndërhyrje të menjëhershme. Pritet që numri i vizitorëve të vijojë të rritet, sidomos pas konfirmimit zyrtar se Lin është vendbanimi më i vjetër në kontinentin europian.
