Në Korçë është hapur zyrtarisht godina e re e Akademisë së Arteve Marciale, një hap i rëndësishëm për zhvillimin e sportit në qytet. Iniciativa është drejtuar nga profesori dhe themeluesi i saj, Dorian Potka, i cili prej vitesh punon me përkushtim për ta bërë taekwon-donë dhe boksin pjesë të jetës sportive korçare.
Godina e re ofron kushte moderne dhe pajisje të standardeve më të fundit, duke u dhënë mundësi fëmijëve dhe të rinjve të ushtrojnë sportin e tyre të preferuar në një ambient bashkëkohor.
Aktualisht dhjetëra fëmijë ndjekin me pasion stërvitjet, duke gjetur në këtë akademi jo vetëm formim fizik, por edhe edukim në disiplinë dhe respekt.
Të pranishëm ishin edhe emra të mëdhenj të sportit në vend so Pavlina Evro Ylli, anëtare e Kryesisë së K.O.K.SH.-së dhe presidente e Komitetit Olimpik Rajonal , Ari Cuashi, presidenti i federates shqiptare te Taekwondo-se, si dhe Z. Fuli Kalivopulos, anëtar i Kryesisë së K.O.K.SH.-së dhe president i Federatës Shqiptare të Boksit.
Profesor Potka thekson se synimi i Akademisë është jo vetëm përgatitja e sportistëve të rinj, por edhe përhapja e kulturës sportive në komunitet, duke e bërë taekwon-donë një zgjedhje të shëndetshme për fëmijët dhe të rinjtë e qytetit.
