Një 23-vjeçar është arrestuar nga Policia në stadiumin e Bilishtit pas një incidenti të dhunshëm gjatë një aktiviteti futbollistik. Shtetasi F. M., banues në fshatin Tresenik, u vu në pranga nga Specialistët për Hetimin e Krimeve në Komisariatin e Policisë Devoll për disa vepra penale.
Sipas njoftimit zyrtar, i riu ka kundërshtuar me dhunë punonjësit e Policisë gjatë shoqërimit për në Komisariat. Ai gjithashtu ka ofenduar dhe sharë efektivët, duke krijuar një situatë tensionuese që çoi në ndërhyrjen e menjëhershme të forcave të rendit.
Ndaj tij rëndojnë akuzat për veprat penale “Kundërshtimi ndaj punonjësit të rendit publik, kryer me dhunë”, “Mosbindje ndaj urdhrit të punonjësit të rendit publik”, dhe “Prishja e rendit dhe qetësisë publike”.
Materialet procedurale janë referuar në Prokurori për veprime të mëtejshme ligjore.
