Edhe këtë verë, Parku “Rinia” në Korçë është mbushur me zëra fëmijësh dhe atmosferë festive, falë kampit veror “Miqësia”, një projekt i Bashkisë Korçë që prej 17 vitesh ofron argëtim, edukim dhe përfshirje sociale për më të vegjlit.
Prej datës 1 korrik, kampi ka hapur dyert për 250 fëmijë nga qyteti, njësitë administrative, familje në nevojë dhe fëmijë me aftësi ndryshe. Fëmijët janë të ndarë në dy grupe dyjavorëshe, duke zhvilluar aktivitete të larmishme psiko-sociale dhe edukative, gjithmonë nën kujdesin e mësuesve dhe stafit profesional.
Ky kamp, i cili ofrohet plotësisht falas, përfshin edhe një vakt ushqimor për çdo fëmijë. Kryetari i Bashkisë Korçë, z. Sotiraq Filo, e cilësoi “Miqësinë” si një nga projektet më të suksesshme, pasi nuk synon vetëm argëtimin, por edhe forcimin e vlerave sociale, barazisë dhe miqësisë mes fëmijëve.
“Ky është një kamp gjithpërfshirës që synon t’u japë të gjithë fëmijëve, pavarësisht prejardhjes ose aftësive, mundësinë të argëtohen, të mësojnë dhe të krijojnë miqësi të reja,” u shpreh Filo.
Ndërkohë, Marjana Jorgji, Drejtore e Drejtorisë së Kujdesit Social, theksoi interesin në rritje për këtë kamp: “Kërkesat kanë qenë shumë të larta dhe presim që vitin e ardhshëm numri i fëmijëve pjesëmarrës të rritet.”
Fëmijët e pranishëm kanë treguar entuziazëm dhe kënaqësi për aktivitetet që organizohen çdo ditë, duke e bërë këtë kamp një moment të paharrueshëm në verën e tyre.
Kampi veror “Miqësia” do të vazhdojë aktivitetet e tij deri më 31 korrik.
