Një ngjarje e rëndë është regjistruar në zonën turistike të Dardhës, ku një 39-vjeçar nga Bilishti ka kanosur me armë punonjësit që po kryenin punime asfaltimi në rrugën e fshatit.
Menjëherë pas marrjes së njoftimit, shërbimet e Policisë kanë ndërmarrë veprimet për kapjen e shtetasit G. M., i cili dyshohej se ishte fshehur në një stallë pranë kufirit me Greqinë.
Burime zyrtare bëjnë me dije se gjatë operacionit të zhvilluar nga Policia Kufitare, është lokalizuar vendndodhja e tij, por për shkak të terrenit të vështirë malor, ai ka arritur të kalojë në mënyrë të paligjshme në territorin grek.
Gjatë kontrolleve të detajuara në zonën ku dyshohej se ishte strehuar, janë sekuestruar armë zjarri, lëndë narkotike, para dhe sende të tjera të dyshuara si të paligjshme.
Shtetasi G.M. është tashmë në kërkim për disa vepra penale të rënda, përfshirë “prodhim dhe shitje të narkotikëve”, “përshtatje e ambienteve për kultivim droge”, “armëmbajtje pa leje”, “kanosje”, “kalim i paligjshëm i kufirit” si dhe “mosbindje ndaj urdhrit të policisë”.
Ndërkohë, Drejtoria Vendore e Policisë Korçë ka nisur hetime të thelluara për të zbuluar lidhjet e mundshme të këtij shtetasi me rrjete kriminale aktive në zonë.
