Polena me një mozaik vlerash kulturore dhe historike nuk është e dëgjuar vetëm për karnavalet e famshme të saj. Fshati i njohur i Kprçës, si pjesë të trashëgimisë së vet ka edhe muzikën.
“Polena s’ka patur instrumenta muzikore, por nëpër dasma këndonin pa orkestër. Si kori Lira edhe fshati ynë ka patur korin e vet që si të thuash ishte krijuar nga përvoja dhe trashëgimia” thotë Ilir Koroveshi, me profesion mjek, por që ka dy pasione të fshehta: atë të kitarës e serenatave dhe më të thekur akoma studimin e historikut të fshatit nga ka prejardhjen.
Në këtë terren sa të vogël por edhe nxitës e ushqyes të Polenës, Ilir Koroveshi do përjetonte mbresat e para të emocioneve që përcillnin serenatat origjinale. Nisi të këndonte si tenor te miku i familjes, i mirënjohuri Gaqo Jprganxhi, dhe më pas si fëmijët e tjerë të asaj kohe frekuentoi grupin artistik te ish shtëpia e pionierit me profesor Gaqo Nano.
“Një shoku im në klasën e pestë më kërkoi ta ndihmoja për detyrat e matematikës, por kur i pashë kitarën në shtëpi nuk më la sedra pa e gjetur një kitarë edhe unë. Ma dhanë te shtëpia e pionierit por pa tela dhe çelësa” kujton Ilir Koroveshi.
Si të gjithë të rinjtë që në një moment vihen para dilemës se çfarë zgidhje duhet të bëjnë në jetë, Ilir Koroveshi doli nga udhëkryqi me vendimin për të vazhduar studimet e larta. Nuk e dëgjoi këshillën e shokut të klasës, muzikologut të ardhshëm e të njohur Pandi Bello që e ftoi të ndiqnin shkollën e muzikës. E “tradhëtoi” kitarën për bluzën e bardhë të mjekut.
Një pjesë të karrierës së tij profesionale si mjek, në fillimet e tij Ilir Koroveshi e ka kaluar në Tropojë. U aktivizua atje në grupe artistike, dhe si natyrë e çlirët dhe i hapur me njerëzit krijoi një bashkëpunim me këngëtaren Fatime Sokoli e cila e ndihmoi të ushtrohej në pianon e pallatit të kulturës të Tropojës. Dhe në një koncert te ky pallat dëgjoi të thërrisnin nga salla: Doktor Iliri, këndona një serenatë! Ishte ky një lloj vlerësimi për korçarin që sillte diçka ndryshe në ambjentin e Tropojës.
“I bie kitarës, i bie me nota dhe këndoj sa mundem në amjente shoqërore” thotë Ilir Koroveshi, i cili befason jo rrallë kur rrëmben mikrofonin dhe shfaq pasionin e tij të serenatistit.
Çlodhja e preferuar për mjekun Ilir Koroveshi janë takimet që organizon me parenë e miqve të tij. Për vetë profesionin që ka dhe njohjet e shumta shoqërore e miqësore mund të organizonte shpesh të tilla, por Ilir Koroveshi tregohet sqimtar. Në parenë e tij ka si kusht që të pranishmit të mos pijnë duhan në amjent të brendshëm, dhe mbi të gjitha kushti kryesor që të mos krijojnë grindje por vetëm hare dhe këngë.
E njeh edhe grupin e kitaristëve nga Devolli, për të cilët shprehet se ka admirim nga organizimi i tyre për të ruajtur traditën e serenatave. Siç e ka për krenari që me krijimtarinë e serenatave të Polenës është publikuar një album me këngë dhe ai ndihet me shpirt e interpretim pjesë e tyre.
