Shërbimet e Drejtorisë Vendore për Kufirin dhe Migracionin Korçë kanë goditur një rast të kontrabandës me lëndë drusore, gjatë kontrolleve të zhvilluara në afërsi të kufirit të gjelbër me Greqinë.
Në fshatin Arrëz, janë konstatuar 3 kamionë pa targa, të ngarkuar me 24 metra kub dru, të dyshuar të jenë prerë dhe transportuar në mënyrë të paligjshme nga territori grek.
Për këtë rast, janë proceduar penalisht në gjendje të lirë 5 shtetas:
- B. M., 46 vjeç
- A. A., 67 vjeç
- E. Z., 41 vjeç
- E. H., 44 vjeç
- B. H., 48 vjeç (vëllezër)
Të gjithë banues në fshatin Arrëz, për veprat penale “Kalimi i paligjshëm i kufirit shtetëror” dhe “Kontrabanda me mallra të tjera”.
Gjithashtu, është proceduar penalisht edhe shtetasi M. A., 35 vjeç, djali i 67-vjeçarit A. A., për veprën penale “Mosbindja ndaj urdhrit të punonjësit të policisë së rendit publik”, pasi ndërhyri gjatë veprimeve procedurale dhe nuk iu bind urdhrave të efektivëve për t’u larguar nga vendngjarja.
Kamionët dhe lënda drusore u sekuestruan në cilësinë e provës materiale.
Policia Kufitare thekson se kontrollet përgjatë kufirit me Greqinë dhe zonave përreth do të vijojnë pa ndërprerje, me qëllim parandalimin e paligjshmërive dhe lëvizjeve ilegale.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë për veprime të mëtejshme ligjore.
