Një takim i rëndësishëm me fokus zhvillimin e turizmit u zhvillua sot në ambientet e Bashkisë Korçë, ku morën pjesë anëtarë të Komitetit për Zhvillimin Turistik, përfaqësues të bizneseve, institucioneve vendore dhe aktorë të tjerë lokalë. Takimi synonte të analizonte ecurinë e deritanishme të sektorit, të diskutonte sfidat që po përballet turizmi në rajon dhe të përvijonte hapat e ardhshëm drejt një modeli të qëndrueshëm dhe gjithëpërfshirës.
Në fokus të diskutimeve ishte analiza e potencialeve natyrore, kulturore dhe ekonomike të Korçës si destinacion turistik. Përmes metodologjisë SWOT, pjesëmarrësit identifikuan pikat e forta, dobësitë, mundësitë dhe rreziqet që duhen adresuar për të ndërtuar një strategji të qëndrueshme, e cila e vendos turizmin si shtyllë kryesore të zhvillimit lokal.
“Nevojitet një qasje e re, e menduar mirë dhe në bashkëpunim të ngushtë me komunitetin dhe biznesin lokal. Turizmi nuk është më vetëm sezonal, por duhet të zhvillohet në mënyrë të qëndrueshme dhe gjithëvjetore,” u theksua gjatë takimit.
Në përfundim, u ra dakord për hartimin e një plani konkret veprimi, i cili do të përfshijë nisma të reja për promovimin e Korçës, përmirësimin e infrastrukturës turistike, si dhe zhvillimin e produkteve të reja që ndërthurin trashëgiminë kulturore, natyrën dhe ofertën bashkëkohore për vizitorët.
Bashkia Korçë konfirmoi edhe një herë se do të mbetet një partnere aktive dhe e hapur për dialog, në funksion të një turizmi me standarde, që gjeneron zhvillim ekonomik, punësim dhe një imazh të qëndrueshëm për qytetin dhe gjithë rajonin juglindor.
