Drejtoria Vendore e Policisë Korçë ka kryer një sërë veprimesh procedurale në kuadër të hetimeve për ngjarje të ndryshme kriminale në rajon.
Specialistët për Hetimin e Krimeve të Komisariatit të Policisë Korçë arrestuan në flagrancë shtetasin G. T., 23 vjeç, banues në Korçë. I riu kishte thyer masën e sigurisë “Arrest në shtëpi”, të caktuar nga Gjykata e Korçës për veprën penale “Mashtrimi”.
Po ashtu, nisi procedimi penal ndaj shtetasit G. M., 66 vjeç, banues në fshatin Voskop, pasi dyshohet se nga pakujdesia ka shkaktuar zjarr, duke djegur një sipërfaqe toke me bimësi.
Nga Komisariati i Policisë Maliq, u referuan materialet në Prokurori dhe u shpall në kërkim shtetasi E. B., 29 vjeç, banues në Pirg, pas një kallëzimi të bërë nga një 36-vjeçare, e cila pretendon se ai i ka hyrë në oborrin e banesës pa pëlqim.
Ndërkohë, pas raportimit për largimin nga banesa të shtetasit A. B., 70 vjeç, me probleme të shëndetit mendor, policia bën me dije se ai është gjetur pasdite në gjendje të mirë shëndetësore dhe është kthyer pranë familjarëve.
Materialet procedurale për këto raste i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
