Drejtoria Vendore e Policisë Korçë ka bërë bilancin e veprimeve operacionale të 24 orëve të fundit, ku janë shënuar disa arrestime, procedime penale dhe sekuestrime armësh.
Specialistët për Hetimin e Narkotikëve arrestuan shtetasin K. S., 37 vjeç, banues në Cërrik, pasi gjatë kontrollit fizik iu gjet një sasi lënde e dyshuar narkotike e llojit kanabis.
Në Pogradec, Specialistët e Qarkullimit Rrugor referuan materialet në Prokurori për shtetasin A. Ç., 22 vjeç, i cili u kap duke drejtuar automjetin pa leje drejtimi.
Po në Korçë, Specialistët për Hetimin e Krimeve proceduan penalisht:
L. Sh., 49 vjeç, i dyshuar për vjedhjen e një biçiklete në pronësi të një 24-vjeçari;
R. T., 31 vjeç, për dhunë fizike ndaj shtetasit E. P., 36 vjeç, për motive të dobëta;
E. B., 28 vjeç, banues në Dishnicë, pasi dyshohet se ka ndezur aksidentalisht zjarr, duke shkaktuar djegien e një sipërfaqeje të mbjellë me grurë.
Specialistët e Krimeve në Komisariatin e Policisë Pogradec referuan materialet në Prokurori dhe shpallën në kërkim shtetasin E. L., i dyshuar për kryerje të punimeve ndërtimore pa leje. Po ashtu, kanë nisur hetimet pas kallëzimit të shtetasit E. N., 32 vjeç, nga Gurrasi, i cili gjatë punimeve në banesën e tij gjeti një armë zjarri dhe një sasi municioni luftarak, të cilat i kishte poseduar i ati tashmë i ndjerë. Arma dhe municioni u sekuestruan në cilësinë e provës materiale.
Në Devoll, nisi procedimi penal ndaj shtetasit A. Sh., 26 vjeç, banues në Përparimaj, i cili është konfliktuar me dy shtetas të mitur, për motive të dobëta.
Ndërkohë, në Kolonjë, shtetasi P. A., 56 vjeç, banues në Sarandë, u procedua penalisht pasi dyshohet si autor i vjedhjeve në dy objekte kulti në Leskovik.
Po ashtu, më datë 07.07.2025, në fshatin Trebinjë, dyshohet se një shkëndijë elektrike shkaktoi zjarr në banesën e shtetasit A. Q., 71 vjeç, duke sjellë dëme materiale, por pa lëndime në njerëz.
Materialet procedurale për të gjitha rastet janë referuar në Prokurori për veprime të mëtejshme.
